وردەكاری ئاشكرابوونی چیرۆكی خۆشەویستییەكەی عەبدوللـەتیف سەلەفی و چاوان

‌

ئۆرڤان كوڕە عاشقەكە، ئێستا بەدەم قوڵپی گریانەوە، باسی ژیانی خۆی دەكات و لەنزیكەوە بۆ هاورێكانی كۆتایی پەیوەندی ژیانی هاوسەری خۆی دەگێڕێتەوەو بەدڵێكی غەمبارەوە بۆ هاورێكانی چیرۆكی عەشقێكی ناكام باس دەكات. لەو لاشەوە وێنەكانی لەتۆڕە كۆمەڵایەتییەكان دەستاو دەست دەكات و كۆمێنتی بێ‌ ئومێدی بۆ ئەنوسرێت و هەندێكیشیان بە كوڕە قۆزە دڵشكاوەكە لەقەڵەمی ئەدەن. 

ئۆرڤان دەگێڕێتەوە، ئەو هیچ كێشەو گرفتێكی نەبووە، ژیانێكی سادە دەژیان، بەڵام لەپڕ هەموو جوانییەكانی ژیانی هاوسەرییان گۆڕا، پەیوەندییە گەرم و گوڕییەكەی هاوسەریی نەما و ماڵ بووە سەهۆڵبەندان. دواتر وردە وردە بۆی دەركەوتووە هەڵەیەكی گەورە ژیانی هاوسەری لێسەندۆتەوەو ئەویش بێ‌ ئاگایە لەوەی چی روویداوە.

بەڵام لەم رووەوە چاوان بەپێچەوانەوە لەنامەیەكدا ڕایگەیاندووە هەر لەوكاتەی دەستگیراندار بوون، كێشەیان هەبووە. چاوان دەڵێت "بۆیە  ئەوكات لێی جیانەبوومەوە، چونكە: یەكەم،  منداڵ بووم، دووەم: ترسی كۆمەڵگەو داب و نەریت و لۆمەی لۆمەكاران رێگرم بوو. هەر لە دەستگیرانیشدا دایكم پێیگوتم ناگونجێن و جیاببنەوە باشترە، باوكیشم دوای گواستنەوە بۆی پێشنیازكردم كە جیاببمەوە".

د.عەبدولـلەتیف ئەحمەد مستەفا، پێشنوێژ و وتارخوێنی مزگەوتی بەهەشتە لەشاری سلێمانی و یەكێكە لەسەركردەكانی رەوتی سەلەفیەت لەكوردستان، هەروەها یاریدەدەری راگری پەیمانگای زانستە ئیسلامییەكانە لەشاری سلێمانی. ئەو پەیمانگایەی چاوان تیایدا خوێندكاربوو.

چاوان سۆران خوێندكاری قۆناغی كۆتایی پەیمانگای زانسە ئیسلامییەكان بوو  لەشاری سلێمانی. وەك خۆی باسی لێوەدەكات لەبنەماڵەیەكی شیوعی چاوی بەدنیا هەڵهێناوە، بەڵام باوكی نوێژكەر بووەو هاوكاتیش سەفەری حەج و عەمرەشی كردووە.

هەرچی ئۆرڤان یەكێكە لەو گەنجانەی كە لەرێگەی كۆمپانیاكانی ڕاگەیاندنەوە بەزمانی كوردی دەنگ دەخاتە سەر ئەكتەری دراما بیانییەكان و لەو ڕوشەوە، دەنگی لەجیاتی چەندین پاڵەوانی دراماكان دانراوەو سەركەوتووش بووە.

چەند خوێندكارێكی هاورێی چاوان ئاماژە بۆ ئەوەدەكەن كە عەبدوللـەتیف سەلەفی گرنگی زۆری بەچاوان دەداو هەندێك جاریش چاوی دەبڕییە چاوی و لەكاتی وانە وتنەوەیش دیمەنی عاشقبوون بەیەك، بەدی دەكرا.

یەكێك لەهاورێكانی چاوان، بە وێستگەی ڕاگەیاند چاوان زوو زوو دەچووە ژورەكەی مامۆستا عەبدوللـەتیف، كار گەیشتە ئەوەی هەموو خوێندكارەكان هەستیان بە پەیوەندییەكی بەتین كرد بەجۆرێك كارگێڕی پەیمانگاكەشمان هەستیان بەو پەیوەندییە كردبوو.

ئەو هاورێیەی چاوان ئاماژە بۆ ئەوەدەكات، جارێكیان لەكاتی وانە وتنەوەدا بینیویەتی چاوان نامەیەكی پڕ لەخۆشەویستی بۆ عەبدوللەتیف سەلەفی نوسیوە.

ئەو هاورێیەی چاوان دەڵێت: هەرگیز  ئیعجاب بۆ د. عەبدوللـەتیف لەلایەن چاوانەوە نەدەشاردرایەوە، بۆیە سەرجەم خوێندكاران هەستیان بە پەیوەندییەكە كردووە، ئەم رۆژەی لێكەوتەوە.

بەپێی زانیارییەكانی وێستگە، رۆژێك چاوان باسی كەسایەتی عەبدوللـەتیف سەلەفی بۆ هاوسەرەكەی پێشووی ( ئۆرڤان ) دەگێڕێتەوەو ئەوەندە ئیعاجابی بۆ دەربڕیوە وتوویەتی"گومانم نەماوە دكتۆر عەبدوللـەتیف بووە بە پێغەمبەر". 

 

بەپێی زانیارییەكانی وێستگە رۆژانە رۆژی یەك سەعات چاوان لە ژووری تایبەتی د.عەبدوللـەتیف لە كۆلیژ ماوەتەوە دكتۆر عەبدوللـەتیف بانگەشەی ئەوەی كردووە كە بۆیە چاوان سەردانی دەكات ( جن ) چۆتە لەشی هەر ئەم مانەوەیەی چاوان لای دكتۆر عەبدوللەتیف پەیوەندی خۆشەویستی لێوە دروست دەبێت، تەنانەت لەو ماوەیەی كە چاوان رۆژانە ماوەتەوە لای دكتۆر عەبدوللەتیف چاوان هەموو كێشەی خۆی و ئۆرڤانی بۆ باس كردووە، ئۆرڤان بۆ خانەوادەكەی باسكردووە كە دوای ئەوەی بەپەیوەندییە خۆشەویستییەكەی چاوان و كتۆر عەبدوللەتیفی زانیوە چاوان ئەوەی گێڕاوەتەوە بۆ ئۆرڤان كە جارێكیان دكتۆر عەبدوللەتیف وتوویەتی چاوان ئایا ئۆرڤانی مێردت نوێژ دەكات چاوانیش دەڵێت نەخێر نوێژ ناكات، دكتۆر دەڵێت دەزانی یەكجار شەیتان بێ ئەمری خودای كرد خودا بە نەحلەتی كرد، ئەی ئۆرڤانی مێردت رۆژی پێنج جار بێ ئەمری خودا دەكات و نوێژ ناكات گومانی تێدا نییە مارەیتان دروست نەبووەو حەرامن بەیەك.

بەپێی گێڕانەوەكان، هاوسەرەكەی لەو رۆژەوە گومانی زیاتر لەپەیوەندییەكی نهێنی كردووە كە چاوان هەرگیز نەی هێشتووە ئۆرڤان دەستكاری مۆبایلەكەی بكات و هەمیشە پاسۆردی خستۆتە سەری، بۆیە رۆژە بە رۆژ غیرەی زیاتر كردووەو چاودێرییەكانی لەسەر ژیان و هاتووچۆی چاوان چڕتركردۆتەوە، هەر لەبەر ئەوەش بڕیاری داوە ئۆتۆمبێلێكی بۆ بكڕێت و نەهێڵێت بە ئۆتۆمبێلی كرێ‌ هاتووچۆ بكات.

دوای ئەوەی ئۆرڤان ئۆتۆمبێلێكی سفر كیلۆمەتری بۆ چاوانی هاوسەری پێشووی دەكرێت بۆی دەردەكەوێت رۆژانە رۆشتنی ئۆتۆمبێلەكەی چاوان لەماڵەوە بۆ زانكۆو گەڕانەوەی بۆ ماڵەوە 25 كیلۆمەترە، بەڵام ئۆرڤان دوای چاودێرییەكی بەردەوام رۆژانە بۆی دەردەكەوێت رۆژ بەرۆژ كیلۆمەتری ئۆتۆمبیلەكە زیاتر دەكات و تا ئاخر جار دەگاتە 60 كیلۆمەتر لە رۆژێكدا، ئەمە لەكاتێكدا چاوان تەنها كاری رۆژانەی دەوامی كۆلێژ بووە، هیچ كارێكی دیكەی نەبووە، ئایا بۆ دەبێت كیلۆمەتری ئۆتۆمبێلەكە بەرز دەبێتەوە؟؟ ئۆرڤان وەڵامەكەی بەڕونی دەستدەكەوێت بۆی دەردەكەوێت ئۆتۆمبێلەكەی ژوانی عەشق و خۆشەویستی پێ دەبەسترێت، لە ئەنجامدا بۆی دەردەكەوێت كە مامۆستا عەبدوللـەتیف بۆ ئەوەی كەس هەستی پێ نەكات لەگەڵ چاوان بەو ئۆتۆمبیلە كاتی خۆشەویستییان بەسەر بردووە.

بەپێی گێڕانەوەكانی ئۆرڤان، ئیرەیی ناوبراو رۆژ بەرۆژ زیاد دەكات، لەبەرامبەریشدا چاوان هەر بەردەوامە لە پاراستنی مۆبایلەكەی لەوەی بەردەستی ئۆرڤان بكەوێت.

ئۆرڤان بەكەسە نزیكەكانی خۆی وتووە، رۆژانە مۆبایلەكەی دەپاراست تاوەكو بەردەستی من نەكەوێت، رۆژێكیان گەڕامەوە ماڵەوە چاوان لە حەمام بوو مۆبایلەكەی جێهێشت بوو بە كراوەی منیش گەشتێكم كرد بەناو مۆبایلەكەیدا ئیدی بۆم دەركەوت ئەوەی من گومانم بۆ بردووە زۆر لەوە زیاترە، پاشان تووشی حاڵەتێكی دەروونی زۆر ناخۆش بووم  تەقیمەوەوە دەرگای حەمامەكەم كردەوەوە بەتوندی چاوانم هێنایە دەروە وتم هیچ مەڵی هەموو شتێك دەزانم چاوان یەكسەر تەسلیم بوو زۆر ترسا وتی هیچ مەكە من هەموو شتێكت بۆ باس دەكەم و دەستی كرد بە گێڕانەوە دانی بەوەدا نا پەیوەندی هەیە لەگەڵ مەلا عەبدوللـەتیف هەیە.

لەدوای دەركەوتنی پەیوەندییەكەی نێوانیان عەبدوللـەتیف پەیوەندی دەكات بە ئۆرڤانەوە، دەڵێت "كارێك مەكەن دوای هەموولایەك پەشیمان بێتەوە‌" دواتر باوكی ئۆرڤان تكا لەكوڕەكەی دەكات دەستبەرداری ئەو ژنە‌ ببێت و كێشە و ئاژاوە خێزانەكەیان دوربخاتەوە.

لەوبارەیەوە د. عەبدوللـەتیف داوای سوڵحی عەشایری كردووە بۆ دەستبەرداربوونی ئۆرڤان لەچاوان لەدادگا، بەڵام ئۆرڤان رەتیكردۆتەوە پارەو پول لەجیاتی دەستبەردان وەربگرێت و د. عەبدوللـەتیف وازی نەهێناوەو چەندین جار پەیوەندی كردووە بە ئۆرڤانەوە پێشنیازی لەبارەی وەرگرتنی دوكان و سۆپەرماركێت و پارەوە بۆ خستۆتە ڕوو لەدوایدا، بەڵام ئۆرڤان سەرجەمیانی ڕەتكردۆتەوە. بەپێی زانیارییەكان عەبدوللـەتیف سەلەفی بۆ ئەوەی هێزی دەوڵەمەندبوونی خۆی دەربخات ووتویەتی " لەهەچ شوێنێك سۆپەرماركێتێك سەلەفییەكی لەسەر بێت موڵكی منە".

دواجار رۆژی 1-1- 2016  لەماڵێكدابەئامادەبوونی چەند شایەتێك ئۆرڤان دەستبەرداری چاوان بوو، دواتریش چوارشەممەی ڕابردوو 4-5-2016 لەدادگا ئۆرڤان بەتەواوی و بە فەرمی و لەرێگەی یاساوە وازیهێنا.

دوای ئاشكرابوونی پەیوەندییەكەیان چاوان روودەكاتە ماڵی بەرپرسێكی یەكێتی نیشتیمانی كوردستان، ئەمەش بۆ ئەوەی هەرەِشەكانی ماڵی باوكی و یاخود كاردانەوەكانی تر نەگاتە سەری.

چاوان ماوەی چەند رۆژێك لەماڵی ئەو بەرپرسەی یەكێتی نیشتیمانی كوردستان دەمێنێتەوە، پاشان ئەو بەرپرسە دوای ئاسای كردنەوەی كێشەكە  لەرێگەی یەكێك لە پیاوەكانییەوە چاوان دەنێرێتەوە ماڵی باوكی.

لەسەرەتادا باوكی چاوان زۆر توند بوو لەسەر ئەوەی چاوان واز لە ئۆرڤان بهێنێت و شووبكات بە عەبدوللەتیف، بەڵام چاوان هەر سور دەبێت لەسەر ئەوەی شوبكات بە عەبدوللەتیف، هەر لەدوای ئاشكرا بوونی پەیوەندییەكەی چاوان و عەبدوللەتیف، عەبدوللەتیف بۆ سوڵح دەچێتە ماڵی چاوان و دوای گفتووگۆیەكی زۆر مەلا عەبدوللەتیف دەڵێت چاوان بهێنن ئەگەر وتی شوناكەم بە عەبدوللەتیف ئەوا كۆتای دێت بە كێشەكە، كاتێك چاوان بانگ دەكەن بۆ ناو دانیشتنەكە چاوان لەناو هەموویاندا دەڵێت شوی پێدەكەم دوای ڕۆشتنی عەبدوللەتیف كەسوكاری چاوان بڕیار دەدەن حاشا بكەن لە چاوان، بەڵام دوای ئەوەی چاوان هەڵهات بۆ ماڵی ئەو بەرپرسەی یەكێتی كێشەكە لە سەدا سەد لەناو خێزانی چاواندا پێچەوانە بوویەوە پاشگەز بوونەوە لەو بڕیارانەی كە قەرار بووە حاشا بكەن لە چاوان. 

ئەمڕۆ دووشەممە 9ی ئایاری 2016، د. عەبدوللـەتیف ئەحمەد ناسراو بە عەبدوللـەتیف سەلەفی و چاوان سۆران، هاوسەرە تازەكەی لەبەردەم دادنوسی دووی سلێمانی لە شەقامی سەهۆڵەكەدا بینران.

بەپێی زانیارییەكان هاتنی ئەو دوانە بۆ شەقامی سالمی شاری سلێمانی بەمەبەستی مامەڵەی یاسایی بووە، تاوەكو بەتەواوی ژیانی هاوسەرییان پێكەوە بنێن و بچنە كەژاوە زێڕینەوە.

دواتر تۆرە كۆمەڵایەتییەكانی فەیسبوك پڕبوو لەوێنەی ئەو دوو عاشقەی كە هاتنە بەردەم كامێرایان لەئێستادا پێی باش نییە، هەر بۆیە بەدزییەوە چەند وێنەیەكیان گیرا.

نامەیەك لەچاوانەوە

چاوان سۆران، هاوژینی نوێی د. عەبدوللەتیف ئەحمەد ناسراو بە د. عەبدوللەتیف سەلەفی، بۆ یەكەمجار بێدەنگی دەشكێنێت و لە نامەیەكدا كە تایبەتدا كە ئەمرۆ دووشەممە 9/5/ 2016 بلاوكرایەوە دەڵێت: "بە ویستی خۆی د. عەبدولەتیف سەلەفیی هەڵبژاردووە". 

چاوان كە تاوەكو ئێستا بێدەنگیی هەڵبژاردبوو بۆ یەكەمجار لە رێگەی نامەیەكەوە ئاشكرایدەكات كە ئەو ئێستا هاوژینی د.عەبدوللەتیفە، تەنانەت بڕی مارەییەكەشی ئاشكرادەكات و دەڵێت "مارەیی من تەنیا بریتی بووە لەوەی دكتۆر تەفسیری قورئانی پیرۆز بە زمانی كوردی تەواوبكات و پێشكەشی بكات و موسڵمانانیش لێی بەهرەمەندبن".

چاوان هەموو ئەو دەنگۆیانە رەتدەكاتەوە كە دەڵێن ماڵی باوكی سوڵحیان لەگەڵ د.عەبدوللەتیف كردووە‌ و پارەیان وەرگرتووە‌ و دەڵێت: "هیچ بڕە ماددەیەك داوا نەكراوە و ئەو درۆ و بوهتانانەش كە دەكرێن گوایە دكتۆر كۆمەڵێك دوكانی داوە بە من، یاخود بۆ سوڵح دوورە لە راستی".

چاوان باسی هاوژینی پێشووی دەكات و دەڵێت: "رۆژی 8-9-2013  بووەتە خێزانی ئۆرڤان، بەڵام هەر لەوكاتەی دەستگیراندار بوون، كێشەیان هەبووە".

چاوان دەڵێت: "بۆیە ئەوكات لێی جیانەبوومەوە، چونكە: یەكەم،  منداڵ بووم. دووەم: ترسی كۆمەڵگە و داب و نەریت و لۆمەی لۆمەكاران رێگرم بوو، هەر لە دەستگیرانیشدا دایكم پێیگوتم ناگونجێن و جیاببنەوە باشترە، باوكیشم دوای گواستنەوە بۆی پێشنیازكردم كە جیاببمەوە".

دواجار، وەك لە قسەكانی چاوان دەردەكەوێت، هەریەكە لە چاوان و هاوژینەكەی گەیشتوونەتە قەناعەت كە لێكجیاببنەوە، چاوان دەڵێت: "هەردووكمان گەیشتینە ئەو قەناعەتەی جیابوونەوەمان باشترین چارەسەرە،  زۆر بە تەبایی و هاوڕاییش دانیشتین و شایەتمان بانگكرد و  بێ هیچ كێشەیەك لە 1-1-2016 جیابووینەوە".

چاوان لە نامەكەدا باسی هۆكاری شووكردنی بە د.عەبدوللەتیف دەكات و دەڵێت "دكتۆر بە شاهیدی گشت خوێندكارانی پەیمانگا نەك تەنیا هی ئەمساڵ، بەڵكو لە یەكەم ساڵەوە كە هاتووە بۆ پەیمانگا پلە یەكی بەدەستهێناوە لە هەڵسەنگاندنی (فیدباك feedback)ی خوێندكاران بۆ مامۆستایان، ئەمەش لەبەر دینەكەی و رەوشتبەرزییەكەی و زیرەكییەكەی و سەركەوتنی لە وانەوتنەوە و پەروەردەكردنی خوێندكاردا، منیش وەكو خوێندكارێكی پەیمانگا كۆمەڵێك سیفاتی باشم لە دكتۆردا بینی كە بوونە هۆكاری ئەوەی ئارەزوو بكەم هاوسەرگیری لەگەڵدا بكەم".

چاوان لەنامەكەدا كە بۆ رۆژنامەی رووداوی ناردبوو، جیاوازیی تەمەنی لەگەڵ د.عەبدوللەتیف بە رێگر نەزانیوە لەوەی شووی پێبكات و دەڵێت: "من كە ئافرەتێكی تەڵاقدراو بووم، دین و رەوشت و زیرەكیی دكتۆرم بەلاوە گرنگتر بوو لە هەڵبژاردنی گەنجێكی هەرزەكاری دین لاوازی بێ عیلم. هەر كەسێك كە تۆزێك ویژدان و عەقڵی هەبێت دەزانێت من دین و ئەخلاقم هەڵبژاردووە، ئەگینا من چاك دەمزانی دكتۆر تەمەنی لە من زیاترە و  خاوەنی دوو خێزان و كۆمەڵێك منداڵە (ماشائەڵڵا)".

دوای ئەوەی هەواڵی پەیوەندیی دكتۆر عەبدولەتیف سەلەفی و چاوانی خوێندكاری و هاوسەرگیرییەكەیان بڵاوبوەوە كاردانەوەی جیاوازی لێكەوتەوەو بووە جێگەی باسوخواسی میدیاكان و لە ئێستادا پرسیاری ئەوە دەكرێت ئایا پێشتر پەیوەندی نێوان ئۆرڤان و چاوان چۆن بووە؟

بەگەڕان بەنێو تۆڕی كۆمەڵایەتی فەیسبوكدا و ئەكاونتەكەی چاوان، ئەوە دەردەكەوێت كە ئەو دوو هاوسەرە پێشتر پەیوەندییەكی ئاساییان هەبووە و چەند جارێك چاوان لە ئەكاونتەكەی خۆی وێنە و ڤیدیۆی ئۆرڤانی هاوسەری بڵاوكردووەتەوەو تا ئێستاش وێنە و ڤیدیۆكان ماون و لانەبراون.

لە رۆژی 24-4-2015 چاوان ڤیدیۆیەك بڵاودەكاتەوە كە لە كۆمەڵێك وێنەی ئۆرڤان دروستكراوەو لەسەری دەنوسێت "گیان و دڵ و هەموو ژیانی من".

لەڕۆژی 12-7-2014 چاوان وێنەیەكی تری ئۆرڤان لە ئەكاوتنی فەیسبوكەكەی خۆی بڵاودەكاتەوەو لەسەری دەنوسێت "هەناسەكەم".

دوای ئەوەی چەندین نامەی دەنگی عاشقانەی ناوبراو لەتۆڕی كۆمەڵایەتی فەیسبوك بڵاوكرایەوە، عەبدوللەتیف ئاماژەی بۆ ئەوەكرد كە ئەو تۆمارە دەنگییانە راست و دروستنین بۆی هەڵبەستراوەو لایەنی سیاسی لەپشت بڵاوكردنەوەین، بەڵام شارەزایانی دەنگ زوو هاتنە سەر هێڵ دوپاتیان كردەوە كە تۆمارە دەنگییەكان دروستكراو نین. بۆ ئەو مەبەستەش شارەزایەكی دەنگی ئیسلامی جەختی لەسەر ئەوەكردەوە كە تۆمارە دەنگییەكان دروستكراو نییە، ئەمەش زیاتر سەرنجی كەناڵەكانی ڕاگەیاندنی بەلای خۆیدا ڕاكێشا و دواتر بابەتەكە بەدواداچوونی زیاتری لەسەر كرا.

لەو سەرو بەندەدا شارەزایەك لە ئیسلامی سیاسی لەبارەی ئەو دەنگانەی مەلا عەبدوللـەتیف سەلەفییەوە كە بڵاوكراونەتەوە، وتی"ئەگەر دەزانیت بوختانت بۆ دەكەن بۆ ناچیت دادگا بگریت و ئەو كەسانە بدەیتە دادگا، كە دەنگەكانیان بڵاوكردووەتەوە".

سۆران سێوكانی سارەزا لە ئیسلامی سیاسی لە پەیامێكیدا لە تۆڕی كۆمەڵایەتی فەیسبووك نوسیویەتی، "بەنیسبەت مامۆستا عبد اللەتیف ئەگەر دەزانیت بوختانت بۆ دەكەن ئەگەر دەڵێی ئەو دەنگانە هەمووی درۆو هەڵبەستراون، بۆ ناچیت دادگا بگریت لێیان وئەو كەسانە بدەیت بەدادگا، كە دەنگەكانیان بڵاو كردۆتەوە.

سێوكانی ئاماژە بە ئەوە دەكات‌‌ "ئەو كاتە دەزانین كێ راستەو كێ درۆیە".

ئەی چالاكەوانێكی چەپی ژن چی دەڵێت؟

بەهار مونزیر، چالاكەوان لەتۆڕی كۆمەڵایەتی لەبارەی ئەو مەسەلەیەوە دەڵێت ئیستا دیوە زاڵە كەی ژیان پەردەی لەسەر ( عبدول لەتیف سە لە فی ) هەڵماڵی ، خۆ ئەگەر باوەڕەكەی ڕێگە بە فرە ژنی دەدات، بەڵام ڕیگە بەوە نادات پەیوەندی خۆشە ویستی لەگەل كەسیك بكات وەك ئەوەی خۆی بە كوڕە گەنجەكان دەڵیت حە ڵاڵی بێت ؟ ئەی بۆ جامانەكەت فڕئ نادەیت و تەسلیم بوونیت بۆخۆ شەویستیەكی وەك خۆت دەڵیت حەرام ڕاناگەیەنیت ؟ درۆكانت بۆ گەنجان بەس بەوە سپی دەبنەوە....ئەوە تەنها دونیاكەی ئیمەیە ڕێز لە هەستو خۆشەویستی دەگرێت ،،،، تەنها یەك دنیا.

 عەبدوللـەتیف ئەحمەد (عەبدوللـەتیف سەلەفی) یەكێك لە رابەرانی رەوتی سەلەفی لە كوردستان لە بارەی پەیوەندی ژن و پیاو لە شوێنی ئیشدا رایدەگەیەنێت، نابێت ژن و پیاو لە شوێنی ئیشدا بە تەنیا لە ژوورێكدا دابنیشن، ئەمەش "بۆ ئەوەی ناموسی كچان و خوشكان پارێزراو بێت".

 عەبدوللـەتیف ئەحمەد، مامۆستای ئاینی لەسەر رەوتی سەلەفی لە لێدوانێكی پێشووتریدا بۆ تەلەفزیۆنی ئێن ئاڕتی دەڵێت: "ئیسلام رێ لە ئیشی ئافرەت ناگرێت بە مەرجێك بە رەوشتەوە بێت".

وتیشی: "لە ئاینی ئیسلامدا و بەپێی فەرمودەی پێغەمبەر درودی خوای لەسەر بێت، حەرامە ژن و پیاو بە تەنها لە ژوورێكدا دابنیشن بۆ ئەوەی ناموسی كچان و خوشكان پارێزراو بێت."

عەبدوللـەتیف لەسەر ئیشكردنی ژن و پیاو پێكەوە دەڵێت "پیاوێك تەلەفۆنی بۆ كردووم و پێی وتووم كە هاوسەرەكەم فەرمانبەرە لە یەكێك لە بەڕێوەبەرایەتییەكان و لەگەڵ فەرمانبەرێكی پیاودا كاری كردووە، پیاوەكە دەستدرێژی سێكسی كردووەتە سەر هاوسەرەكەم، ئێستا نازانم ئەگەر بیشارمەوە ئەوا پیاوەكە كارتی فشاری بەدەستەوەیە و زیاتر دەیەوێت ئیهانەی بكات".

هەر بۆیەوە دەڵێت : "حەرامە ژن و پیاو بە تەنها لە ژوورێكدا دابنیشن بۆ ئەوەی ناموسی كچان و خوشكان پارێزراو بێت".