‌پاریس..لە روداوێکی تەقەکردندا دوو پۆلیس كوژران
PM:10:31:20/04/2017

وێستگه‌ نیوزـ

له‌ روداوێكی ته‌قه‌كردندا له‌ ناوه‌ڕاستی پاریس-ی پایته‌ختی فه‌ره‌نسا، پۆلیسێك كوژرا و دوانی دیكه‌ش برینداربووک.

ئاژانسه‌كانی هه‌واڵ بڵاویانكرده‌وه‌ كه‌ روداوه‌كه‌ ئه‌مشه‌و 20ی نیسانی 2017، له‌ ناوچه‌ی شالنزلی-ی گه‌شتیاریی به‌ناوبانگ له‌ ناوه‌ڕاستی پاریسی پایته‌خت روویداوه‌ و ئه‌وه‌ش كه‌ ته‌قه‌ی كردووه‌ به‌ ده‌ستی هێزه‌كانی پۆلیس كوژراوه‌ته‌وه‌.

به‌پێی میدیاكانی فه‌ره‌نسا هێرشبه‌ره‌كه‌ چه‌كی كڵاشینیكۆفی به‌كارهێناوه‌ و دوای رووداوه‌كه‌ش هێزێكی ئه‌منیی زۆر له‌ ناوچه‌ی شالنزلی-ی گه‌شتیاری بڵاوه‌ی پێكراوه‌.

هێزه‌ ئه‌منییه‌كانی پاریس شوێنی رووداوه‌كه‌یان گه‌مارۆ داوه‌ و رێگه‌یان به‌ هاوڵاتیان نه‌داوه‌ لێی نزیك ببنه‌وه‌.

سه‌باره‌ت به‌ پاڵنه‌ره‌كانی پشت ئه‌و رووداوه‌ش، وه‌زاره‌تی ناوخۆی فه‌ره‌نسا رایگه‌یاندووه‌ كه‌ هێشتا زووه‌ بۆ ئه‌وه‌ی بزانرێت چ هۆكارێك له‌پشت ئه‌و ته‌قه‌ هه‌ڕه‌مه‌كییه‌ و هێرشی چه‌كداره‌كه‌وه‌ بووه‌.

دوای ماوه‌یه‌كیش له‌ رووداوه‌كه‌ بییر هێنری براندێ، وته‌بێژ به‌ناوی وه‌زاره‌تی ناوخۆی فه‌ره‌نسا رایگه‌یاند كه‌ رووداوه‌كه‌ به‌ ئه‌نقسه‌ت بووه‌ و یه‌كێك له‌ پۆلیسه‌ برینداره‌كانیش به‌هۆی سه‌ختیی برینه‌كه‌یه‌وه‌ گیانی له‌ده‌ستداوه‌.

له‌لایه‌كی دیكه‌وه‌ فرانسوا ئۆلاند، سه‌رۆكی فه‌ره‌نسا داوای كه‌بوونه‌وه‌یه‌كی به‌په‌له‌ی ئه‌منیی كردووه‌ و ژووری به‌ره‌نگاربوونه‌وه‌ی تیرۆری ئه‌و وڵاته‌ش ده‌ستیان به‌ لێكۆڵینه‌وه‌ له‌ رووداوه‌كه‌ كردووه‌.




ئه‌م بابه‌ته 7813 جار خوێنراوه‌ته‌وه‌‌


هەواڵی زیاتر

Copyright 2016. westga.net. All Rights Reserved.