ئەردۆغان لەکاتى نوێژى جەژندا بووراوەتەوە

‌ڕەجەب تەیب ئەردۆغان

وێستگە نیوز -

ڕۆژنامەکانى تورکیا بڵاویانکردەوە ڕەجەب تەیب ئەردۆغان لەکاتى نویژى جەژندا لە مزگەوتێکى ئەستەنبوڵ بووراوەتەوە.

 ڕۆژنامەى حورییەت لە زارى پەیامنێرەکەیەوە ئاماژەى بەوەکردووە، کاتژمێر شەشى بەیانى و بەر لەوەى نوێژى جەژن دەستپێبکات ئەردۆغان لەهۆشخۆى چووە.

عەزیز ئۆزن، پەیامنێرى ڕۆژنامەى حورییەت باسى لەوەشکردووە کە پاسەوانەکانى و چەند پزیشکێک بەهاناى ئەردۆغانەوە چوون و بردویانەتە شوێنێکى ئارامى مزگەوتەکەوە و هێزە ئەمنییەکان ڕێگەیان نەداوە ڕۆژنامەنوسان نزیکى مزگەوتەکە ببنەوە تا ئەو کاتەى ئەردۆغان بەهۆش خۆى هاتووەتەوە.

ئەردۆغان لەبەردەم مزگەوتەکەدا بە ڕۆژنامەنوسانى ڕاگەیاند، بەهۆى ئەوەى نەخۆشى شەکرەى هەیە فشارى خوێنى بەرزبووەتەوە و بەهۆیەوە لەهۆش خۆى چووە.

ئەوەش لەکاتێکدایە هەر ئەمڕۆ لەوتارێکدا لەدواى نوێژى جەژن ڕەجەب تەیب ئەردۆغان ڕایگەیاند، داوای داخستنى بنکە سەربازییەکەى تورکیا لە قەتەر لەلایەن سعودیە و وڵاتانى کەنداو، بێڕێزییە بەرامبەر وڵاتەکەی.