مووچە وەك بارمتە ‌

وا نیوەی مانگی تەمموز تێپەڕی و هێشتا نەك دابەشكردنی بەشێك لە مووچەی مانگی ئایار دەستی پێنەكردووە بەڵكو ئەو خشتەیەش بڵاونەكراوەتەوە كە چەند مانگی رابردوو لە سەرەتای مانگدا بڵاویان دەكردەوە.

حكومەتەكانی ئەم جیهانە پان و بەرینە ئەركیان ئەوەیە كاروبارەكانی وڵات بەڕێوەبەرن و پلان بۆ ئێستا و ئایندە لە بوارە جیاجیاكاندا دابنێن، جا ئەگەر داهاتیان كەم بێت یان زۆر هیچ جیاوازییەكی نییە. چونكە ئەركی بەڕێوەبردنی وڵات و دەزگا و دامەزراوە و كۆمەڵگەكەیە بەو داهات و بەرنامەیەی لە بەر دەستدایە.

وا چەند ساڵێكە هەرێمی كوردستان تووشی قەیرانێكی سیاسی بووە و پێدەچێت قەیرانە داراییەكەش درێژكراوەی قەیرانە سیاسییەكەش بێت، بۆیە ئەگەر لانی كەمی سیستم و بەرنامە و پلان لەم وڵاتەدا هەبووایە ئەوا قەیران نەدەكرایە بیانووی وەلانانی بودجەی ساڵانە. چونكە ئەگەر داهاتیش كەم بێت و قەیران هەبێت، ناكاتە ئەوەی حكومەتەكە بەرنامەی نەبێت و بودجەی نەبێت كە بودجە وەك بەرنامەی ساڵانەی حكومەت وایە بۆ زۆربەی بوارەكان.

ئەگەر ورد بین و دیقەت بدەین زۆربەی ئەو كاتانەی دۆخی سیاسی تووشی چەقبەستوویی دەبێت وەك ئەوەی ئێستا بە هۆی ریفراندۆم و دوای سەردانی وەفدی ئەنجومەنی ریفراندۆم بۆ ئەوروپا دروست بووە، دۆخی ئابووریش تووشی چەقبەستووی دەبێت و رەنگە زۆر كەسیش بەو هۆیەوە بڵێن، مووچە و قووتی خەڵك كراوەتە بارمتەی ئاریشە سیاسییەكە.

ئێستا كاتی ئەوە نییە بڵێن وا نییە و ئابووری و سیاسەت لەم هەرێمەدا پێكەوە نەبەستراون و مووچە نەكراوەتە بارمتەی دۆخی سیاسی، بەڵكو كاتی ئەوەیە بە كردار بەرپەرچی ئەو قسانە بدەنەوە.

ئەوەی وەزارەتی دارایی بە تایبەتی و حكومەتی هەرێمی كوردستان لەگەڵ خەڵكی كوردستان یان لانی كەم لەگەڵ مووچەخۆرانی ئەم هەرێمە دەیكات شتێكی زۆر سەیروسەمەرەیە، نیشانەی ئەوەیە ئەوەی هەمانە چیتر وەزارەت نییە بەڵكو لیژنەیەكە و بە خواستی سیاسی لایەنێك یان كەسێك دەست بەدابەشكردنی مووچە دەكات. هیوادارم هەڵەبم.

PM:03:06:18/07/2017

ئه‌م بابه‌ته 2099 جار خوێنراوه‌ته‌وه‌‌

هەموو وتارەکان کاتێک لە وێستگە نیوز بڵاودەبێتەوە تەنها بیروبۆچونی خاوەنەکانێتی