‌شەڕ لە یاریگاكانی (ئەمریكاو ئەوروپا) تۆز لە دەرگای ئێمە

وێستگە سپۆرت-

وێستگە سپۆرت-

سەنگەر کاکۆ

 
دەستپێكردنی یارییەكانی پاڵەوانێتی تۆپی پێی وڵاتانی كیشوەری ئەمریكا، ئەوە پاڵەوانێتی تۆپی پێی وڵاتانی ئەوروپاشی هاتەسەر، ئەو دوو پاڵەوانێتییە سەرنجی هەموو جیهان بەلای خۆیدا رادەكێشێت، جگە لە چەند نەتەوەیەكی نەگبەتی وەك ئێمەو هاوچەشنی خۆمان نەبێت، ئەم مانگە بۆ هاوڵاتیانی جیهان رووداوێكی گرنگ و خۆش و پڕچێژەو بە ئاسانی دەتوانن بۆبینینی یارییەكان روو لە وڵاتانی رێكخەری پاڵەوانێتیییەكان بكەن و ماوەیەكی خۆش بەدیار یارییەكانەوە بەسەر بەرن.

ئەوەی بۆ ئێمە دەمێنێتەوە بینینی یارییەكانە لە رێگای شاشەی تەلەفزیۆنەكانەوە، بۆ ئەوەش پێویستت بە دەیان تەڕو تەشقەڵە دەبێت تاوەكو بتوانی كەناڵێك دابین بكەیت بۆ ئەوەی یارییەكان ببینی.

تەماشاكردن و هاوسۆزی و رەخنەگرتنەكانیش لە یاریی و پاڵەوانێتییەكان لای ئێمە تەواو پێچەوانەیە، لەبەر ئەوەی شەڕ لەیاریگاكانی ئەوروپا و ئەمریكایەو تۆزەكەشی لەبەر دەرگای ئێمە، هاوسۆزی و هاندەریی سەرسەختی تەماشاكەرانی ئێمە بۆ تیپە جیهانییەكان بەتایبەتی لە یاری تۆپی پێدا بەشێوەیەك چڕو توند بۆتەوە كە زۆرجار كارەساتی ناخۆش و لێكترازانی پەیوەندی كۆمەڵایەتیشی لێدەكەوێتەوە، كێبڕكێ و ئاراستە جیاوازەكان بۆ یارییەكان گەیشتوونەتە ئاستێك كە ململانێی توند لە نێوان ژن و پیاو، هاوڕێ و هاوڕێ، خوشك و برا دروست ببێت، ئەمەش تەواو پێچەوانەی گیانی وەرزشییە، چونكە وەرزش خۆی لە خۆیدا گیانی لێبوردەیی و یەكتر قبوڵكردن و سنگ فراوانییە نەك رك و بوغزو كینە.

هاوكات لەو ماوەیەدا بەدەیان شیكارو پسپۆڕی تۆپی پێمان لێ قووت دەبنەوەو هەریەكەو  بە ئارەزووی خۆی و لەبەرژەوەندی ئەو تیپەی هاوسۆزی بۆی هەیە دەكەوێتە شەن و كەوكردنی یارییەكان و بە دەیان رەخنەی كوتەك ئاسا دەبەخشێتەوە بێ ئەوەی هەر هیچ نەبێت كەمێك دەستی بڵند بكات بۆ ئەوەی كەسێك كوێر نەكات.

ئەوەی لەم ماوەیەدا زیاتر دەبێتە ئامانجی شیكارو رەخنەگران و هاندەرە سەرسەختەكان، ناوبژیوانە داماوەكانن، كەس قسەیەكی باشیان بۆ ناڵێت و هەموان دەكەونە سەنگەر لە دژیان و هەموو دۆڕان و شكستەكان دەخەنە ئەستۆی ناوبژیوانەكان.

كاتی ئەوە هاتووە ئێمەش بە سنگ فراوانییەوە بڕوانینە یارییەكان و بردنەوەو دۆڕان و یەكسانەكان نەبنە هۆی هەڵچوونمان و دڵی یەكتری بێ بڕەنجێنین. 


PM:04:17:11/06/2016


ئه‌م بابه‌ته 1065 جار خوێنراوه‌ته‌وه‌‌